كان في بنوتة جميلة جدًا اسمها آسيا، عايشة في بيت كبير
آسيا علطول مرحة وبتسعد اللي حواليها وبتلعب معاهم كتير

آسيا مكانش عندها اخوات، وأقرب واحدة ليها هي مامتها
بيقضوا وقت كتير مع بعض، وماما بتحب تسمع من آسيا حكاياتها

آسيا بنوتة ذكية جدًا وعشان كده كل الناس كانوا بيحبوها
وفي المدرسة كل الأطفال كانوا دايمًا عاوزين يقربولها ويصاحبوها

وفي يوم من الأيام ماما كانت كالعادة الصبح بتسرح لآسيا شعرها
ولكن آسيا طلبت من ماما تغير تسريحتها وملامح حزن على وشها

ماما استغربت جدًا وسألت آسيا، مالك يا حبيبتي ليه كده متضايقة
آسيا مكانتش عاوزة تحكي لماما، ولكن ماما كانت مصرة تبقى عارفة

أخدتها في حضنها بهدوء وقالتلها تحكيلها كل حاجة ومتخبيش
لأنهم علطول أصحاب وقريبين، وقالتلها احكي براحتك ومتخافيش

آسيا قالتلها، في بنت في المدرسة قالت على تسريحتي مش حلوة
وأنا من ساعتها حاسة إني شكلي مش حلو وإني مش زي ما بتقوليلي جميلة

ماما قالتلها طيب أنا عاوزة أسألك على حاجة وتجاوبيني بصراحة
هل إنتي لما بتبقي عاملة التسريحة بتاعتك، بتبقي مبسوطة ومرتاحة؟

آسيا قالت لماما، أه بحبها، ولكنها سكتت تاني وقالت لأ مش عارفة
ماما في الوقت ده كانت عارفة إيه اللي بيدور في دماغ آسيا وكانت فاهمة

قالتلها إوعي تغيري أبدًا من نفسك عشان حد قرر يعلق عليها
وطالما إنتي مرتاحة في شكلك، أي تعليقات متشغليش بالك بيها

ودايمًا تسألي نفسك هل إنتي مبسوطة بكل حاجة بتعمليها؟
ولو اجابتك كانت لأ من جواكي، في الحالة دي بس ممكن تغيريها

وخدي بالك جدًا، ناس كتير هتبقى عاوزاكي تكوني نسخة تانية منها
وخليكي عارفة، انتي بتتغيري عشان صورة في دماغك عاوزة توصليلها

وإوعي تخلي حد يهز ثقتك بنفسك وإنك تشوفي نفسك وحشة
كل واحد جميل لوحده، ومينفعش نقبل أو نسمح بأي مقارنة