كان في بنت اسمها دانا، كانت بنوتة هادية جدًا ولطيفة
بتحب كل أصحابها وعيلتها، وبتقضي معاهم أوقات جميلة

دانا كانت كل يوم بتصحى الصبح تبص على العصافير
كانت بتحب تسمع صوتهم وتشوف شكلها بتطير

وكانت عارفة عصفورتين كل يوم ييجوا يقفوا عند شباكها
يقعدوا يغنوا ويطيروا وبتتفرج عليهم وعلى وشها ابتسامتها

وكانت دانا بتستناهم وتحطلهم أكل على الشباك كل يوم
والصبح لما ييجوا ويبدأوا ياكلوا ويغنوا بيصحوها من النوم

وفي يوم، دانا كانت قاعدة بتتفرج على العصافير كالعادة
ولكن في صقر كبير طار ورا عصفورة منهم وطارت وهي خايفة

دانا اتخضت جدًا ومكانتش عارفة تعمل إيه وكانت قلقانة
وللأسف العصفورة هربت منه لبعيد أوي ودانا كانت زعلانة

وقعدت طول اليوم مستنية العصفورة يمكن ترجعلها
ولكن العصفورة مرجعتش يومها ولا في أي يوم من الأيام كلها

دانا قعدت أيام حزينة وعلطول بتبص على الشباك
كان نفسها العصفورة ترجع في يوم وتاكل من طبقها هناك

ماما لاحظت إن دانا مبقتش مبسوطة زي عادتها
دخلت عندها الأوضة وحضنتها واتكلمت معاها وسألتها

ولما دانا حكتلها الحكاية، ماما طبطبت عليها وباستها
وقالتلها إنها فاهمة حزنها وزعلها على عصفورتها

ولكن قالتلها لازم تفهمي إن العالم حوالينا ده مكان كبير
وإنه فيه كائنات وحيوانات ليهم حياة مختلفة عننا كتير

والعصافير اللي موجودين حواليكي ممكن بكرة يهاجروا بعيد
وبعد ما كانوا بياكلوا من الطبق بتاعك يروحوا مكان جديد

ولازم أبدًا متزعليش ولا تتعلقي بيهم لإنهم مختلفين جدًا
اتبسطي بوجودهم حواليكي ولكن لو مشيوا متزعليش أبدًا

دانا فهمت كلام مامتها واتفقت معاها متبقاش خلاص زعلانة
ونامت يومها وهي بتتمنى إن العصفورة تكون في أمان وفرحانة

كان في بيت جميل، عايش فيه أدهم وتالية مع عيلتهم
كلهم بيحبوا بعض وبيحبوا يقضوا مع بعض أوقاتهم

تالية وأدهم كانوا كل يوم الصبح يقعدوا مع تيتا وقت طويل
وكمان بيخلوها تحكيلهم حدوتة قبل النوم كل يوم بليل

كانوا هما الاتنين بيستمتعوا جدًا بوقتهم معاها
ودايمًا يطلبوا منها تحكيلهم عن حياتها زمان ويسمعوها

وكانوا بيسألوها عن مغامراتها وهي صغيرة في سنهم
وتيتا كانت بتقعد تحكيلهم وبتبقى شايفة ابتسامة على وشهم

ولكن تيتا كانت دايمًا تخرج في وسط اليوم لوحدها
بتغيب شوية وبعدين ترجع البيت ترتاح في أوضتها

تالية وأدهم كانوا عندهم فضول يعرفوا تيتا بتروح فين لوحدها
وفي يوم قرروا يسألوها ولما خرجت قعدوا يستنوها

ولما رجعت تيتا قالولها إن عندهم فضول يعرفوا بتعمل إيه؟
تيتا قالتلهم إنها هتاخدهم معاها في المكان اللي بتكون فيه

وتاني يوم، تالية وأدهم كانوا جاهزين وقاعدين متحمسين
وأول ما تيتا جهزت، أخدتهم عشان يعرفوا تيتا بتروح فين

وبعدها اتمشوا شوية وراحوا عند شارع كبير جدًا
وتيتا بصتلهم وقالتلهم إنها كل يوم بتيجي هنا دايمًا

كانوا لسه مستغربين بس استغرابهم زاد بعد ما حاجة حصلت
بعد ما الشارع كان تقريبًا فاضي، قطط كتير فيه ظهرت

وكل القطط قربوا جنب تيتا وقعدوا يتنططوا ويلعبوا حواليها
وتيتا وقتها طلعت كيس في أكل كانت ماسكاه في إيديها

وحطت للقطط أكل وقعدوا جنبها ياكلوه وهما متطمنين
وقتها أدهم وتاليا فهموا تيتا كانت بتروح فين وكانوا مبسوطين

وساعدوا تيتا إنها تأكل أكبر عدد من القطط حواليهم
ولما خلصوا وروحوا قالولها إن دي أكتر حاجة بسطتهم في يومهم

ويومها اتعلموا أهمية الرفق بالحيوان وإنه شئ جميل جدًا
وطلبوا هما الاتنين من تيتا لما تروح تاخدهم معاها دايمًا

وبعدها بقوا يحكوا لكل أصحابهم على اللي بيعملوه معاها
وشجعوهم يعملوا زيهم، وكل حد عنده قطط يروح يأكلها

وعرفوا إن حيوانات الشارع ميقدروش دايمًا يساعدوا نفسهم
وإنهم لما يأكلوهم، بيهونوا عليهم جزء من تعب يومهم

كان في بيت جميل، ساكنة فيه بنوتة اسمها ديما مع عيلتها
ديما كانت لطيفة ومرحة جدًا والناس بتحب تشوف ضحكتها

ديما كانت علطول بتحب تتكلم مع صحباتها في المدرسة
وكمان بيتفقوا سوا ويروحوا النادي ويقضوا أوقات حلوة

وفي يوم ديما كانت في النادي مع صحباتها بيلعبوا
وعملوا حركة كتير اوي وبعد وقت طويل من اللعب تعبوا

ديما وأصحابها راحوا السوبر ماركت وجابوا شوكولاتة
لإنهم كانوا جعانيين من اللعب الكتير وعاوزين طاقة

وقعدوا ياكلوها ويضحكوا ويتكلموا وكانوا مبسوطين
ولما روحت ديما البيت كانت جايبة شكولاتات تانيين

ودخلت أوضتها وكانت قاعدة بتاكلهم لما ماما دخلت لها
ماما قالتلها إنها مش المفروض تاكل الحلويات دي كلها

ديما سابت الشوكولاته ونامت يومها، وتاني يوم راحت المدرسة
وكالعادة وهي مروحة البيت اشترت مع صحباتها حاجات حلوة

وقعدوا ياكلوا فيها طول الطريق لحد ما وصلوا بيوتهم
ديما مكانتش قادرة تتغدى مع عيلتها بسبب الحلويات اللي كلتهم

وأخر اليوم بعد ما خلصت ديما مذاكرتها طلعت الحلويات بتاعتها
وكانت قاعدة بتاكلهم لما ماما دخلت عليها أوضتها وشافتها

ماما قالتلها إنها نبهتها كذا مرة من أكل الحلويات وإنه مضر جدًا
وإنها لو اتعودت تاكلها كتير، مش هتقدر تستغنى عنها أبدًا

وطبعًا لو أكلت منها كتير هتأذيها وهتسبب لها أضرار كتير
ديما قالت لمامتها إنها مش فاهمة ليه أكل الحلويات غلط كبير

ماما قالتلها إن الحلويات كلها سكر وبيخلي جسمنا يتعب جدًا
وإن الحلويات هتأثر على سنانها وتركيزها وكمان طاقتها هتقل دايمًا

لإن الحلويات بتديها طاقة أول ما تاكلها وبعدين بتروح بسرعة
وتلاقي تفسها عاوزة تاكل تاني عشان يرجع لجسمها النشاط والطاقة

وقالتلها إنها لازم تبقى بتعمل كل حاجة بشكل معقول
وغلط جدًا تعرف إن حاجة مضرة وتعملها علطول

لإنها بتأذي صحتها اللي هي المفروض تحافظ عليها دايمًا
وتاكل حاجات تفيدها ومتعودش نفسها على حاجة تضرها أبدًا

ديما بنوتة لطيفة جدًا، وبتحب تقضي وقتها سعيدة
وكانت دايمًا بتدور ممكن إيه الحاجة اللي تعملها في يومها جديدة

يوم مثلًا تصحى تلون وترسم ويوم تاني تجرب تقرأ قصة
وساعات تركب عجلتها أو حتى تجرب تزرع زرعة

ورمضان بالنسبة لها كانت بتحب تجرب فيه حاجات مختلفة
زي إنها تساعد مامتها تطبخ الفطار أو تتعلم تعمل حاجة حلوة

وفي يوم كانت مع صحباتها بتلعب في حديقة القرية
وسمعت صاحبتها بتتكلم وبتحكي معاهم عن رحلة

الرحلة كانت تبع المدرسة بتاعتهم، وهيروحوا مزرعة كبيرة
هيجربوا يقطفوا الثمار يومها وياكلوا من الخضروات والفواكه

ديما اتحمست جدًا وقررت إنها تروح الرحلة مع صحباتها
ولكن طبعًا كانت لازم تستأذن الأول لما تروح البيت من مامتها

وفعلًا لما روحت البيت، جريت ديما على ماما تحكيلها
وقالتلها على الرحلة وفكرتها وإنها حاجة جديدة تجربها

مامتها كانت سعيدة جدًا بالفكرة ووافقت فعلًا تروحها
وديما كانت سعيدة بموافقتها لحد ما قالتلها على ميعادها

لما ماما عرفت ميعاد الرحلة وإنه هيكون يوم الجمعة الجاية
قالت لديما إنه اليوم ده عندهم عزومة والرحلة مش هتكون مناسبة

ديما زعلت جدًا وحاولت تقنع ماما إنها تسيبها تروح معاهم
وإن العزومات بتتكرر وإن صاحباتها عاوزينها تكون وياهم

ماما قعدت مع ديمًا تتكلم معاها وقتها عشان تفهمها
إن الفكرة مش في العزومة، ولكن في لمة العيلة وأهميتها

وإن الأوقات اللي بنقضيها مع العيلة لازم نعتبرها مهمة
لإن مع الوقت مقابلاتنا بتقل بسبب الظروف والمسؤولية

وعشان كده لازم لما تيجي فرصة للمة العيلة نستغلها
ونحاول نكون موجودين ونستمتع بكل حاجة بتحصل يومها

ومنستهونش بالعيلة وبوجودها كل مرة نتجمع فيها
لإن ممكن تيجي أيام كتيرة، اللمة دي تكون حاجة بنحلم بيها

كان في غابة كبيرة، مليانة بأشجار كتيرة وحيوانات
الحيوانات عايشين مع بعض، وبيقضوا أجمل الأوقات

وقبل الشتاء من كل سنة، بيبقى عندهم مهام كتيرة
كل الحيوانات بتجمع أكل للشتاء يكفي كل العيلة

وبيبقوا من أول النهار لآخره كلهم مشغولين
لإنهم كمان بيظبطوا بيوتهم عشان يبقوا متدفيين

اللي بيته محتاج تصليح بيظبطه وبيملاه بأكل كتير
وعشان كده كل الغابة بتبقى مشغولة بيستعدوا بشكل كبير

وفي وسط الغابة كان عايش بيكو السنجاب مع عيلته
كان هو واخواته مقسمين مهام تجميع الأكل وكل واحد عارف دوره

وعشان بيكو كان الكبير فيهم، كان مسؤول عن أكبر كمية
وهو فعلًا كان بيصحى من بدري لحد أخر اليوم بيشتغل بسرعة

يوم ورا يوم وبيكو عمال يجمع أكل لحد ما ملى بيته كله
أهله كانوا مبسوطين عشان جمعوا الأكل اللي البيت محتاجه

ولكن بيكو كان لسه عمال يجمع أكل أكتر يوم بعد يوم
ولما مامته تقوله كفاية، كان يقولها احنا محتاجين الأكل يدوم

ومبقاش بيسمع كلامهم لما يقولوله إنهم خلاص مش محتاجين
وإن الأكل اللي معاهم هيكفيهم في الشتاء ويكونوا مبسوطين

لحد ما في يوم، كل البيت مبقاش فيه مكان ليهم
الأكل في كل حته وبقى المكان بتاعهم ضيق عليهم

قرر بيكو ينقل الأكل لمكان قريب جدًا منهم
عشان يبقى عنده مساحة أكبر يجمع أكل تاني عشانهم

وفي يوم رجع بيكو للمكان الجديد عشان يحط الأكل اللي جمعه
ولكنه ملقاش نص الأكل هناك ومبقاش عارف راح فين مكانه

ولما سأل مامته، قالتله إن باقي السناجيب أخدوه
مكانوش لاقيين أكل في معظم الغابة ومجمعوش اللي هيحتاجوه

ولما لقوا بيكو بيجمع أكل كتير أكتر من حاجته اشتكوا لمامته
وقالولها إن بيكو أخد معظم الأكل ومسابش ليهم حاجة

وعشان كده مامته قررت تسيبلهم نص الأكل بتاعهم
لإنهم معاهم أكل كتير وطول الشتاء الكمية هتكفيهم

بيكو كان مضايق ومش فاهم مامته عملت كده ليه
قالتله لإنك من الأول مسمعتش كلامي اللي قلتلك عليه

احنا كان عندنا كفاية ولكنك طمعت في أكتر منه بكتير
وده خلاك تأذي السناجيب التانيين أذى حقيقي كبير

انت اخدت اللي هما محتاجينه عشان يبقى عندك بزيادة
ولكنهم مكانوش عارفين يجمعوا أي أكل من الغابة

وقالتله إنه لازم يتعلم إن الطمع بيأذي غيرنا جدًا
لإنه بيخلينا ناخد حاجة احنا مش محتاجينها أبدًا

وبنخلي غيرنا محتاج وحزين لإنه مش عارف يحقق هدفه
واحنا كمان بنشوف إن اللي معانا دايمًا عاوزين أكتر منه

وده بيخلينا مش راضيين ولا مبسوطين أبدًا عن حياتنا
وقالتله إنه لازم يتعلم يرضى دايمًا بالحاجة اللي في إيدنا

كان في غابة كبيرة وواسعة، فيها حيوانات كتير جدًا
كلهم بيعيشوا مع بعض في سعادة وحب دايمًا

كان استاذ سلحوف بياخد الأطفال من كل الحيوانات يعلمهم
بيلف معاهم الغابة ويعرفهم عليها وعلى الأسئلة بيجاوبهم

بيعرفهم إزاي يخرجوا من أي مشكلة ممكن يقعوا فيها
وبيحكيلهم حواديت عن مغامراته وبيستمتعوا بيها

كان البغبغان بيجو والصفدع روني بيروحوا مع أستاذ سلحوف
كانوا أصحاب قريبين وبيقضوا وقت مع بعضهم لطيف

وفي يوم، روني الضفدع كان قاعد طول اليوم سرحان
ومكانش مركز في كلام أستاذ سلحوف وشكله كان زعلان

بعد ما خلصوا مع أستاذ سلحوف، بيجو البغبغان سأله مالك
شكلك في حاجة مضايقاك، احكيلي ممكن اساعدك

روني قاله إن كل اخواته بيعرفوا يعوموا إلا هو الوحيد اللي مش بيعرف أبدًا
ولما بييجوا يقولوله ينزل معاهم المياه بيدور على أي حجة دايمًا

وعدى اليوم، وبعدها كان بيجو واقف مع روني وباقي أصحابهم
وكلهم كانوا بيلعبوا عند النهر، واقترحوا يعملوا مسابقة ما بينهم

الطيور يعملوا مسابقة طير ما بينهم والباقيين يعملوا مسابقة عوم
واللي هيكسبوا، هياخدوا هدية من أصحابهم واستاذ سلحوف تاني يوم

رد البغبغان بيجو وقال مش هينفع أصل روني مش بيعرف يعوم
روني بصله وكان زعلان، ومشي وسابهم وكان من بيجو مصدوم

ولما بيجوا راح عشان يشوفه ماله زعل ومشي بسرعة ليه
روني قاله لإنه قال على السر ومكانش من حقه يقول عليه

بيجوا استغرب ومكانش فاهم هو ليه الموضوع كبير
وراح لمامته وحكالها وقالها هو زعلان ليه مع إن السر مش خطير

ماما قالتله ولكنه سر، مينفعش أبدًا تقول لأي حد تاني عليه
مهما كان بالنسبة لك حاجة عادية ومش مهمة، لازم تحتفظ لنفسك بيه

ولازم تعرف إن طالما صاحبك قالك عليه يبقى بيثق فيك
ولما انت قولت على السر بتاعه، ده خلاه مصدوم منك

وعشان كده، لازم تروح لروني وتعتذر له وتكون عارف إنك غلطان
وتقوله إنك مكانش قصدك تزعله، وإنك عرفت غلطك وعليه ندمان

بيجوا عمل كده فعلًا وراح لروني بيته واعتذر له بعدها
ورجعوا تاني أصحاب قريبين، وبيحافظوا على أسرار بعض كلها

كان في بنوتة اسمها ليلى، كانت هادية وشخصيتها لطيفة
كانت بتحب تلعب وتقعد مع صحباتها أوقات طويلة

ليلى كان عندها أصحاب كتير بس ندى هي أقرب صحباتها
بيقعدوا مع بعض في الفصل وكمان بتزورها في بيتها

ولما ليلى كانت تضايق من حاجة تروح تحكي لندى بسرعة
وبيتكلموا مع بعض، وندى بتخليها تحس بسعادة وفرحة

وفي يوم ليلى راحت المدرسة وعزمت ندى على عيد ميلادها
ندى اتحمست جدًا وقعدت تفكر في هدية لصاحبتها

لحد ما ندى قررت تجيب لليلى سلسلة عشان تلبسها
وفعلًا راحت مع مامتها اشترت الهدية لليلى عشان عيد ميلادها

ولما جه يوم عيد الميلاد، ندى جهزت ولبست فستانها
وهي خارجة قعدت تدور على الهدية ولكن مكانتش لقياها

كانت زعلانة جدًا ولكن مامتها قالتلها لازم نروح عشان منتأخرش
ندى راحت من غير الهدية، ومامتها قالتلها هندور عليها تاني ومتزعلش

وراحت ندى العيد ميلاد وقضت اليوم مع ليلى وباقي صاحباتها
ولكن ليلى أخدت بالها إن ندى مجابتلهاش هدية عيد ميلادها

لما خلص العيد ميلاد ليلى قعدت زعلانة في أوضتها جدًا
ولما ماما سألتها، قالتلها إنها مش عاوزة تكلم ندى أبدًا

لإنها مجابتلهاش هدية في يوم مميز زي ده عشان تبسطها
ولو هي فعلًا بتحبها كانت هتجيبلها هدية وتحاول تسعدها

ماما قالت لليلى ولكن باقي أصحابك جابولك هدايا كتير
وبعدين أهم حاجة إن ندى قضت معاكي وقت كبير

الهدايا عمرها ما كانت أهم حاجة نعبر بيها عن حبنا
في طرق كتيرة جدًا نبين بيها الحب اللي جوانا لغيرنا

ولازم نقدر ظروف اللي حوالينا ونلتمس ليهم أعذار دايمًا
ومينفعش نعلق حبنا على حد بغلطة مش مقصودة أبدًا

ليلى فهمت كلام مامتها واقتنعت بيه ومبقتش زعلانة
واتعلمت إنها لازم تتبسط بالحاجات اللي موجودة وتبقى فرحانة

كان في ولد اسمه حسن، كان ذكي ومجتهد جدًا
كان علطول بيحب يجرب حاجات جديدة ومختلفة دايمًا

حسن كان متفوق في مدرسته لإنه كان بيحب المذاكرة
وبيخلص كل اللي وراه علطول ومش بيضيع وقته

وفي الأجازة كان بيحب يتعلم حاجات كتيرة جديدة
وبيخرج من الأجازة مجرب حاجات مميزة ومختلفة

وفي يوم في الأجازة حسن طلب من باباه يعلمه حاجة
قاله إنه عاوز يجيب عجلة عشان يركبها ويروح بيها المدرسة

باباه اتفق معاه إنه هيجيبله العجلة ويعلمه عليها براحة
ولكن بشرط، يلتزم بكل التعليمات اللي هيقوله عليها ببساطة

حسن اتفق مع باباه يسمع الكلام، وفعلًا حددوا يوم وبدأوا
ونزلوا اشتروا العجلة وراحوا الحديقة عشان يعلمه

في الأول باباه حطله فيها سنادات عشان يتعلم فيها
ولكن حسن مكانش عاجبه لإنه سنه كبير عليها

وقال لباباه إنه مش عاوز السنادات وإنه يقدر يسوقها من غيرها
باباه فكره بإتفاقهم وإنه وعده يسمع التعليمات وينفذها

وبعدها لما راحوا تاني، باباه كان بيخليه يمشي براحة
عشان يتعود على العجلة الأول وبعدها ينطلق في السواقة

حسن كان عاوز يخلص بسرعة ومش عاوز خطوات كتير
ومكانش مصدق إن كلام باباه هيساعده بشكل كبير

تاني يوم الصبح أخد العجلة من ورا باباه وراح الحديقة
وقعد يجرب يسوقها من غير السنادات مرات كتيرة

وأخيرًا حس إنه عارف يسوقها وبدأ يجري بسرعة بيها
ولكنه اتكعبل في طوبة ووقع جنب شجرة واتخبط فيها

وبعدها لما روح البيت حاول يدخل أوضته بسرعة
من غير ما باباه يشوفه ويعرف كل اللي هو عمله

ولكن باباه كان مستنيه في أوضته وكان شكله زعلان
وقاله إنه اتصرف غلط جدًا وخلاه حاسس إنه ندمان

لإنه وثق فيه وإنه هيسمع كلامه، ولكنه معملش كده أبدًا
بالعكس ده عرض نفسه للخطر، واتصرف بشكل غلط جدًا

حسن اعتذر لباباه وقاله إنه كان بس عاوز يتعلم بسرعة
ومكانش يعرف إن كل تعليمات باباه اللي قالهاله مهمة

باباه قاله، مفيش حاجة في الدنيا تتقدر تتعلمها من غير قواعدها
لازم تفهم كل حاجة ماشية ازاي قبل ما تبدأ تعملها أو تمارسها

عشان تعرف إيه اللي ممكن يحصل وإزاي تبقى شاطر فيها
لازم تاخد وقتك وتتعلم صح، وبعد كده أي حاجة هتقدر عليها

حسن اتعلم من غلطته يومها ووعد باباه ياخد باله دايمًا
واتعلم بعدها العجلة صح، وبقى بيسوقها حلو جدًا

كان في غابة كبيرة وفيها حيوانات كتيرة جدًا
كل عيلة من الحيوانات بيقضوا وقتهم مع بعض دايمًا

وكان في عيلة القرود واللي ساكنين في جزء كبير من الغابة
أطفالهم بيلعبوا مع بعض وبيقضوا أوقاتهم بسعادة

وكان من ضمن القرود دي قرد اسمه بيدو، وكان شقي جدًا
كان بيتنطط طول اليوم وبيعمل شقاوة ومش بيبقى هادي أبدًا

وفي يوم بيدو وأصحابه كانوا بيلعبوا في الغابة كالعادة
ولقوا قنفد ماشي بيوزع ورق بيعلن فيه عن مسابقة

بيدو راح للقنفد واتكلم معاه عشان يعرف إيه المسابقة ويسأل عليها
القنفد قاله إن الأسد عامل مسابقة للأكل وأي حد يقدر يشترك فيها

بيدو مكانش مهتم ولكن أصحابه شجعوه يدخل المسابقة
لإنه بيعرف يعمل أكلات كتيرة وإنه شاطر وأكلاته حلوة

بيدو وافق وقرر يدخل المسابقة وقعد قبلها أيام كتيرة يتدرب
وكانت مامته بتعلمه حاجات جديدة وبتساعده عشان يكسب

وفي يوم المسابقة، بيدو راح وأخد معاه كل أدواته
وكان متحمس وراحوا معاه كل أصحابه واخواته

بيدو بدأ يطبخ الأكلة المطلوبة وكان متوتر وعاوز يكسب المسابقة
ولكنه كان سريع، وخلص أول واحد واستناهم يخلصوا وأخد راحة

ولما كلهم خلصوا الأطباق بتاعتهم، بدأ الأسد يدوق أكلاتهم
الغريب إن كلهم كانوا حاطين ملح أو شطة زيادة في أطباقهم

لحد ما وصل عند بيدو ولقى إن أكلته هي أحلى واحدة فيهم
وأعلن إنه هو الفائز وأكلته هي أحلى واحدة منهم

وبعد ما أخد الجايزة اخواته وأصحابه احتفلوا بيه وكانوا ومبسوطين
جه القنفد قال للأسد حاجة ضايقته جدًا، مع إن الحيوانات كلهم فرحانين

وطلب الأسد من بيدو يتكلم معاه بعيد عن الحيوانات كلهم
بيدو كان مستغرب ولكنه راح معاه، ووقفوا في مكان لوحدهم

الأسد قاله إن القنفد شافه بيبوظ أطباق باقي المتسابقين
وإن بالرغم من شطارته إلا إنه غش وخان الحيوانات التانيين

والأسد قاله إن الشطارة مش كل حاجة، لازم كمان يبقى أمين دايمًا
وإنه كان ممكن يكسبهم بأمانه وساعتها فرحته كانت هتبقى أكبر جدًا

بيدو كان مكسوف من نفسه واتفق مع الأسد يعتذر ليهم
وقالهم إنه مكانش عنده ثقة في نفسه إنه هيبقى شاطر زيهم

وعشان كده قرر يبوظ أطباقهم ولكنه خجلان من اللي عمله
ووعدهم إنه مش هيضايق حد تاني وهيركز بعد كده على نفسه

كان في بنوتة جميلة اسمها ليا، كانت مرحة ولطيفة
كل يوم بتحب تقعد مع مامتها ويقضوا أوقات جميلة

ليا كانت بتحب مامتها جدًا وبتقلدها في كل حاجة بتعملها
ونفسها لما تكبر تبقى زي مامتها شاطرة جدًا في حياتها

ولما كانت تضايق من حاجة أو تزعل، علطول تقولها
وماما تقعد تتكلم معاها ومش بتسيبها إلا لما تشوف ضحكتها

وماما دايمًا كانت بتشجع ليا عشان تعمل كل اللي نفسها فيه
وبتكلمها دايمًا عن العالم بتاعنا، وإزاي تقدر تحافظ عليه

وفي يوم، ليا قالت لمامتها إنها عاوزة تزرع زرع كتير
لإنها في أنواع كتيرة بتشوفها في الحديقة وبتحبها بشكل كبير

ماما وافقت وراحوا اشتروا الزرعات وزرعوها في البلكونة
وليا بقت بتعتني بيهم علطول، وكانت عنهم هي المسؤولة

ويوم ورا يوم ليا كانت بتهتم أكتر بزرعاتها وعلطول بتراعيهم
وكل ما تعجبها زرعة جديدة تشتريها وتزود فيهم

وفي يوم ماما قالتلها متشتريش زرع كتير عشان تقدر تحافظ عليه
لإن لو تركيزها على عدد قليل، هتقدر تاخد بالها منه وتراعيه

ولكن ليا قالت لمامتها إنها تقدر تاخد بالها منهم كلهم
واشترت فعلًا زرع أكتر، وحطتهم في بلكونتها وكانت بتحبهم

كان عندها أنواع مختلفة زي الياسمين والفُل والنعناع والريحان
ومعاهم ورود كتيرة، وألوانهم مختلفة وريحتهم كانت جنان

ولكن يوم ورا يوم الزرع ابتدا يدبل مع إن ليا بتسقيهم
ومبقتش عارفة تعمل إيه ولا عارفة زي الأول تحافظ عليهم

وراحت تعيط لمامتها وقالتلها إنها متضايقة جدًا وزعلانة
ومامتها لما عرفت السبب، قعدت معاها تكلمها بهدوء وابتسامة

وقالتلها إن الزرع عامل زي البني أدمين، كل واحدة مختلفة
وكل زرعة ليها شخصيتها واحتياجاتها وطريقة لرعايتها

في الأول كنتي قادرة تحافظي عليهم عشان كانوا قليلين جدًا
وكنتي بتقدري تفتكري احتياج كل واحدة فيهم وتراعيها دايمًا

ولكن لما كترت المسؤولية عليكي، بقيتي تتلغبطي فيهم
وممكن تنسي تنقلي واحدة للشمس مثلًا أو تنسي تسقيهم

وعشان كدة لازم دايمًا تعرفي حدود قدراتك إيه
ومينفعش أبدًا تتحملي أكتر من اللي تقدري عليه

حتى لو كنتي مبسوطة وسعيدة باللي بتعمليه
المفروض تعرفي حدود قدراتك عشان تنجحي فيه

كان في مزرعة كبيرة موجودة جنب بيت جميل وواسع
المزرعة فيها أحصنة وحيوانات تانية وشكلها كان رائع

في المزرعة دي كان في زهور من كل الأشكال والألوان
وكان فيها نحل كتير، بيلقح الزهور ويعمل عسل طعمه جنان

من النحل دي كان في نحلة اسمها ريما، كانت شقية جدًا
ولكنها كانت كمان ذكية وبتعرف تحقق اللي في نفسها دايمًا

كانت ريما علطول بتحب تتنافس مع صحباتها النحلات
وبيعملوا مسابقات ما بينهم وريما كانت بتكسبها معظم الأوقات

وفي فترة كانوا كل ما يعملوا مسابقة تكسبها ريما النحلة
ومبقاش في حاجة صعبة عليها، وكل التحديات بقت سهلة

فقررت إنها عاوزة تبقى مختلفة عن باقي النحلات التانيين
وقالت إنها هتروح لمكان بعيد عشان تلقح زهور مختلفين

وفعلًا ريما راحت لمكان بعيد عشان تلقح فيه زهور مختلفة
وكانت عاوزة تثبت لصحباتها وعيلتها إنها عنهم متميزة

ولكن بعد شهور من الشغل كل يوم، عملت عسل جميل
وبكده حققت حلمها إنها تكون متميزة بعد ما اشتغلت صبح وليل

ولما رجعت المزرعة لقت كل أصحابها مشغولين عنها
وعندهم حاجات مختلفة في حياتهم عن اللي كانت فيها

ريما بعد ما حكتلهم على نجاحها الجديد كانوا فرحانين بيها
ولكن بعدها كل نحلة كملت شغلها ورجعت انشغلت في يومها

ريما كانت مستغربة هما ليه أصحابها بقوا مش منها قريبين
وكإنهم مكانوش أصحاب قبل كده ولا يعرفوا بعض من سنين

ولما سألت مامتها عن السبب للي بيحصل معاها
مامتها قالتلها إنك اختارتي أولوياتك ومشيتي وراها

ولما كانت أهم حاجة عندك تكوني متميزة وبعدتي عنهم
هما كمان كملوا حياتهم من غيرك وشافوا طريقهم

وده مش معناه انك غلطانة أو إن هما كده وحشين
بالعكس هي الفكرة بس مين اختار يعمل إيه ويعمله مع مين

ومش منطقي أبدًا لما تبعدي عنهم شهور ترجعوا من غير تغيير
بالعكس كل يوم بيعدي من غير ما تبقوا مع بعض بتتغير حاجات كتير

ولو رجعتي تعيشي تاني وسط أصحابك هتقربوا من بعض تاني
ولكن لازم تديهم وقتهم براحتهم ومتتصرفيش بشكل أناني

لإن زي ما انتي اختارتي تبعدي عنهم وتحققي حلمك
هما كمان هيحتاجوا وقت عشان يرجعوا قريبين منك

كان في بيت جميل ساكن فيه عيلة كبيرة لطيفة
كلهم بيحبوا بعض وبيقضوا مع بعض أوقات سعيدة

كان عايش إياد مع مامته وباباه واخواته حياة جميلة
وكان بيحب يساعد اخواته وكلهم كانوا عيلة متعاونة

إياد أكتر حاجة كان بيحبها هي القراءة وبيتبسط أوي بيها
وكل ما يحوش مصروفه يروح المكتبة يشتري قصص منها

وكان بيقعد مع أخوه الأصغر منه يحكيله كمان حكايات
وبيتبسطوا كل يوم مع بعض ويقضوا أحلى الأوقات

ولكن جت فترة المياة كانت بتقطع كتير في البيت عندهم
وده بيخليهم محتاجين يحوشوا مياه ويستخدموها كلهم

ولإن ماما معظم الوقت بتكون مشغولة في البيت جدًا
عملوا جدول كل يوم حد يكون مسؤول عن تحويش المياه دايمًا

واللي مسؤول عن المياه بيتابع إمتى المياه بتيجي ويستناها
وأول ما تيجي يجيب حاجات كتيرة ويقعد يملاها

وفي يوم إياد كان عليه الدور عشان يملى المياه بتاعتهم
ولكنه كان جايب قصة جديدة وقعد يقراها في أوضتهم

واندمج إياد في القصة ونسي خالص يملى المياه في اليوم بتاعه
وبعد ما خلص القصة اكتشف إنه النهاردة كان الدور عليه

إياد كان زعلان جدًا لإن المياه جت وقطعت وهو نسيها
وقعد يفكر في حلول ولكنه ملقاش حل للمشكلة اللي بيمر بيها

راح لمامته واعتذر لها لإنه نسي يملى المياه زي ما اتفقوا
ماما كانت متضايقة ولكنها اتبسطت إنه كان حاسس بغلطه

وعاتبته لإنه المفروض يهتم بالأولويات اللي مع بعض بيحددوها
وقالتله يفكر معاها ممكن يحلوا إزاي المشكلة اللي بيواجهوها

إياد فكر مع ماما واقترح إنهم يشتروا مياه اليوم ده ويستخدموها
وكإعتذار منه هيساهم بجزء من مصروفه عشان يشتروها

ماما اتبسطت بردة فعله وشكرته على تفكيره في المساعدة
وعرف يومها إياد إن المفروض يركز دايمًا على الحاجات المهمة

وميخليش الحاجة اللي بيحبها وبتبسطه تاخد وقته كله ليها
لإن الحياة فيها مسؤوليات كتير لازم يعرف إزاي يركز عليها