كان في بيت كبير، ساكن فيه عيلة جميلة وسعيدة
كل يوم العيلة دي بتتجمع وتقعد تعمل حاجات جديدة

في البيت ده، كان في بنوتة اسمها توتا وكانت لطيفة
دايمًا تصحى بدري وتحضر لعيلتها مفاجأة جميلة

مرة تقطف لهم ورد من الجنينة، ومرة تحضر ساندويتشات
وتجري تصحي كل العيلة، ويقضوا سوا أجمل الأوقات

توتا كانت بنوتة هادية جدًا وعندها حاجات حلو بتميزها
زي إنها مبتزعلش حد منها أبدًا وبتحاول تسعد كل عيلتها

وفي يوم توتا خرجت تلعب في الحديقة، ولقت قطة صغيرة
القطة كانت عمالة تنونو بصوت عالي، وشكلها خايفة

توتا كانت بتخاف جدًا من القطط ومش بتحب تقرب منهم أبدًا
لكن القطة صعبت عليها، وفكرت إزاي تساعدها زي ما بتعمل دايمًا

راحت توتا لأوضة أخوها وصحته عشان ينزل يساعدها
وفعلًا راح أخوها معاها للجنينة يشوف القطة وإيه حكايتها

لكن لما أخوها قرب من القطة، خافت جدًا وعورت إيده
أخو توتا إتضايق وقعد يعيط، وقال لتوتا إنها السبب في اللي حصله

توتا راحت بسرعة صحت باباها وقالتله على كل الحكاية
وبعدها أخوها اضطر ياخد حقنة أحسن القطة تكون عيانة

يوم والتاني وأخو توتا كان زعلان ومتضايق منها جدًا
ومبقاش يتكلم معاها، مع إن توتا مكانتش تقصد تأذيه أبدًا

توتا كانت متضايقة ومبقتش سعيدة خالص زي عادتها
ولما ماما عرفت الحكاية ندهت على أخوها وندهتها

وقالت لأخوها مينفعش يزعل من أخته على حاجة حصلتله
لأنها مكانتش عارفة إنه هيتعور لما شافت القطة وندهته

وإن توتا كانت بتحاول تعمل خير، ولكن نتيجته مكانتش متوقعة
وده ميخليهاش تفكر إنها تبطل تعمل حاجات كويسة

وقالت لأخوها مينفعش يلوم حد على حاجة حصلت غصب عنه
وإنه لازم يتعلم لما يتعرض لموقف جديد يسأل حد أكبر منه

وقالتلهم إن الموقف ده محدش فيهم كان فيه غلطان
ولكنه درس يتعلموا منه يعملوا الخير ولكن برده يفضلوا في أمان

توتا وأخوها اتصالحوا وعرفوا إنهم مينفعش من بعض يكونوا زعلانين
بالعكس حبهم للخير ومساعدتهم لبعض حاجة تخليهم بنفسهم فخورين

كان في بيت جميل جدًا بين الأشجار في غابة كبيرة
البيت ده بيطل على النهر وساكن فيه عيلة لطيفة

عيلة الدببة اللي كانوا في البيت كانوا لطاف جدًا
وبيحبوا يساعدوا غيرهم في الغابة لما يحتاجوهم دايمًا

كان من وسط الدببة، دب اسمه سمسم، كان طيب ولطيف
كان بيلعب مع اخواته وأصحابه وبيضحكهم ودمه خفيف

سمسم مكانش عنده أصحاب كتير، هما أرنب وغزالة
كانوا بيقضوا وقت كبير مع بعض، بيلعبوا في الغابة

وفي يوم، سمسم كان في الغابة بيدور على زهور نادرة
عشان عيد ميلاد الأرنب صاحبه مودي وعاوز يفاجئه

وقعد وقت طويل وقرر يروح تاني يوم يدور تاني عليها
ولكن بعدها بيوم مامته كانت محتاجة مساعدته معاها

وقعد سمسم يساعد مامته في حاجات محتاجاها كذا يوم
ومكانش عنده أي وقت يدور على الزهور من الصبح لوقت النوم

ولما جه وقت عيد الميلاد سمسم كان حزين ومراحش
لأنه مكانش عاوز يروح لمودي من غير هديه عشان ميزعلش

وبعد العيد ميلاد راح لمودي واعتذر له عشان معرفش يروحله
مودي قبل اعتذاره ولكنه كان عاوز يعرف السبب اللي منعه

سمسم كان مكسوف وقاله إنها حاجة مش هيقدر يقوله عليها
ولكن مودي كان عمال يزن عليه عشان يعرف الحاجة اللي مخبيها

ولكن مودي كان بيسأله كتير وده خلى سمسم يضايق منه
لأنه محترمش خصوصيته وإنه برضه بيسأله بعد ما اعتذر له

ولما مامت سمسم شافته متضايق وعرفت منه الحكاية
قالتله إنها مقدرة مشاعره ولكنه كان غلطان من البداية

الهدية مش أهم من وجودك جنب صديقك في عيد ميلاده
لأنه لو صديق حقيقي مش هيهتم إلا بوجودك جنبه

وهو فعلًا صديق كويس لأنه مزعلش وقبل منك اعتذارك
ولكن ممكن يكون بيسألك عشان عاوز يطمن على أحوالك

وقالتله حتى لو مش عاوز تقوله متزعلش منه لما يطمن عليك
ولازم تقبل أصدقاءك بكل تصرفاتهم طالما هما كويسين معاك

سمسم فهم كلام مامته وصالح مودي ورجعوا تاني أصحاب
واتعلم يركز على الحاجات المهمة اللي تخليهم دايمًا أحباب

في بحر كبير مليان أسماك شكلها جميلة وملونة
كان عايش قنديل اسمه بيرو مع عيلته الصغيرة

كان بيرو بيحب يعوم ويلعب مع باقي أصحابه
وكان عنده أصحاب كتير جدًا لطاف وكلهم أحبابه

بيرو وأصحابه كانوا بيحبوا يلعبوا في الشعب المرجانية
وبيستخبوا ويدوروا على بعض وبتبقى أوقات مسلية

بيرو كان صغير وحجمه كمان صغير جدًا عن باقي أصحابه
وعشان كده مامته كانت بتقوله دايمًا يخلي باله من نفسه

وكانت بتقوله ياخد باله وميبعدش كتير عن بيتهم
ومينفعش أبدًا يفضل بره البيت لوقت متأخر ويقلقهم

وفي يوم، أصحاب بيرو قالوله إنهم رايحين للأعماق في مكان بعيد
وكلهم كانوا متحمسين يروحوا، وبيرو بالفكرة كان سعيد

ولما طلب من مامته طبعًا رفضت وقالتله إنه ده شئ خطير
مينفعش يخرج ويروح الأعماق مع أصحابه لأنه مش كبير

وممكن يتعرضوا لأي شئ هناك ومش هيعرفوا يتصرفوا
ولكن أصحاب بيرو ضحكوا لما عرفوا إنه خايف وعليه اتريقوا

وقالوله إنه كبير ومكانش محتاج يستأذن من مامته
ولما بيرو لقاهم بيتريقوا عليه راح معاهم من ورا عيلته

وخرجوا في يوم يلعبوا كالعادة وراحوا للمكان الي قالوا عليه
كان في أعماق البحر وضلمة جدًا وبيرو كان خايف حاجة تأذيه

فضلوا ماشيين مع بعض وبيلعبوا لحد ما قابلهم حوت كبير
اترعبوا واستخبوا جوه الشعب المرجانية من الحوت الخطير

ولما مشي الحوت بعيد عنهم قعدوا يضحكوا كلهم
ولكن بيرو قالهم إنه عاوز يروح لأنه مش مبسوط زيهم

وسابهم بيرو وراح بيته لوحده، وفي الطريق كان قلقان
حاسس إنه ممكن يبقى في خطر لأنه لوحده في المكان

ولكنه روح أخيرًا بالسلامة ودخل البيت وماما شافته
ولما سألته ليه اتأخر بره، كان خايف احسن تعاقبه

وماما شافت الخوف في عيونه، وقالتله يحكيلها وميخافش
بيرو حكى لماما كل الموضوع، واعتذرلها إنه كلامهما مسمعش

ماما كانت زعلانة منه لإنه عرض نفسه لخطر كبير
وإنه سمع كلام صحابه ومسمعهاش وعمل غلطات كتير

وقالتله ياريت يكون اتعلم الدرس، وإنه ميسمعش كلامهم
لإنهم صغيرين زيه ومش عارفين نتيجة أفعالهم

وكان ممكن جدًا يحصله حاجة ويأذي نفسه وهو لوحده
وإنه الشجاعة مش في التهور، ولا إنه ميسمعش كلام مامته

بيرو اعتذر لماما وقالها إنه مش هيعمل كده تاني أبدًا
ولا هيسمع كلام أصحابه وهيفكر في تصرفاته دايمًا

كان في قرية جميلة، فيها نهر واسع وأشجار كتيرة
وأهل القرية كلهم طيبين وبيتعاملوا مع بعض كعيلة كبيرة

كان أهل القرية عندهم عادة بيعملوها كل صيف دايمًا
بيتجمعوا كلهم ويعملوا احتفال كبير وبيستمتعوا بيه جدًا

في الاحتفال ده بيعملوا أكل كتير وياكلوا مع بعض كلهم
وبيعملوا كمان مسابقات يتسابقوا فيها ضد بعضهم

وبيوزعوا جوايز لطيفة على اللي بيكسب في المسابقات
وكل الأطفال كانوا بيحبوا يلعبوا وبيستنوا المكافآت

ولما جه وقت الاحتفال، جوري كانت مبسوطة ومتحمسة
حضرت مع مامتها لبسها الجديد، وقعدت مستنية

ويوم الاحتفال لبست وجهزت نفسها وخرجت مع أصحابها
راحوا كلهم الاحتفال وهناك قابلت تقريبًا كل أهل قريتها

كانوا عاملين زينة وأكل كتير وكل الناس كانوا حقيقي مبسوطين
ولما جه وقت المسابقة، كل الناس كانوا ليها متحمسين

قسموا نفسهم فرق مختلفة وابتدوا يلعبوا لوقت طويل
والمسابقة كانت فيها بيحلوا الألغاز ويدوروا على الدليل

جوري كانت في الفريق مع أصحابها ولكنهم مكانوش متعاونين
كل واحد فيهم بيلعب لوحده، وكانوا عن الفرق التانية متأخرين

جوري في وسط المسابقة لما شافت انهم خلاص بيخسروا
قالتلهم انها مش هتكمل، وسابتهم لوحدهم يلعبوا

وراحت قعدت بعيد عنهم، بتتفرج عليهم وكانت زعلانة
باباها لمحها وهي قاعدة، وراح يسألها هي ليه متضايقة

ولما عرف إنها خرجت عشان بيخسروا، قالها إنها غلطانة
مينفعش تستسلم في نص المسابقة، وتبطل تعمل محاولة

ولازم تتعلم إن المسابقة مش هدفها بس إنها تدخلها عشان تكسبها
بالعكس، هي المفروض تستمتع بوقتها حتى لو خسرتها

والأهم من كده، إنها مينفعش تسيب فريقها اللي اعتمد عليها
ولازم تبقى قد كلمتها لما وعدتهم تدخل المسابقة وتلعب فيها

وشجعها ترجع لفريقها وتكمل معاهم لعب وتحاول تساعدهم
ويفكروا كلهم مع بعض ويلعبوا كفريق ويجمعوا مع بعض أفكارهم

جوري سمعت كلام باباها ورجعت تاني تكمل اللعب معاهم
وقالتلهم لازم يكونوا متعاونين، وحاولت تحل اللغز وياهم

وفعلًا، كلهم بدأوا يلعبوا كفريق، ويفكروا بصوت عالي
وكانوا بيتبادلوا الأفكار ويحلوا الألغاز واحد ورا التاني

وخلصت المسابقة وطلعوا المركز التاني وأخدوا جايزتهم
ولكن جوري وأصحابها اتعلموا إيه هي أهمية تعاونهم

وفهمت جوري الدرس كويس، وإن الاستسلام مش حل أبدًا
وإن مهما الحاجة كانت صعبة عليها، لازم تفضل تحاول دايمًا

كان في مكان كبير وواسع عايش في حمامات كتيرة
كلهم كانوا أصحاب وبيقضوا مع بعض أوقات جميلة

الحمامات كانوا بيشتغلوا في توصيل الرسايل بين الحيوانات
وكل يوم الصبح يطيروا ويوصلوا الرسايل ما بين الغابات

وفي وسطهم كان في حمامة اسمها تولا وكانت لطيفة
تولا كانت بتحب توصل الرسايل وبتحس إن ليها قيمة كبيرة

وكل يوم الصبح تولا كانت بتبقى أول حمامة تصحى وتطير
وكانت بتطير بسرعة وكل يوم بتوصل عدد رسايل كبير

وفي يوم سألتها صاحبتها ليه بتصحى بدري عن كل الباقيين
قالتلها لإني بحس إن شغلي مهم وبيساعد الحيوانات التانيين

وكل رسالة بوصلها بيبقى ليها معنى عند صاحبها اللي بيستلمها
وبحس إني بخلي كل الغابات قريبة من بعض بالمساعدة اللي بقدمها

وفي يوم، صحيوا الحمامات ولقوا الدنيا بتمطر جامد جدًا
وقرروا ميوصلوش رسايل لأنهم بيطيروا في المطرة بصعوبة دايمًا

ولكن بعدها تولا لقت الغزالة بوني بتخبط على باب بيتها
وقالتلها إنها محتاجاها توصل الرسالة دي ضروري لمامتها

ولكن تولا قالتلها إن الدنيا بتمطر ومش هتقدر توصلها
الغزالة قعدت تعيط، لأن الرسالة فيها حاجة مهمة تقولهالها

بوني صعبت على تولا جدًا وقررت إنها تساعدها
وأخدت منها الرسالة وقالتلها هتعمل اللي عليها وتوصلها

ولكن لما الحمامات لقوا تولا خارجة، قالولها تستنى لبكرة
ولكن تولا قالتلهم إن الغزالة مستعجلة، لأن الرسالة مهمة

ولما قالولها ولكنك هتتعبي في المطرة ومش مهم النهاردة
قالتلهم إن ده واجبها ولازم تعمله مهما كانت المطرة صعبة

وخرجت تولا وطارت في المطر وكانت بتطير بصعوبة
ولكنها كان عندها إصرار إنها تعمل المهمة المطلوبة

وفعلًا بعد وقت طويل، وصلت تولا الرسالة لمامت بوني الغزالة
ولما مامتها فتحت الرسالة شكرت تولا على مساعدتها الكبيرة

وقالتلها إن بوني الغزالة خرجت من أيام ومرجعتش لبيتها
وإنها كانت خلاص فقدت الأمل إنها ممكن تاني تقابلها

ولكن رسالتها عرفتها إنها بخير ولكنها مريضة مش قادرة
وعشان كده قررت تبعت الرسالة عشان تعرفني إنها كويسة

وشكرت مامتها تولا جدًا وقالتلها قد إيه هي فخورة بيها
وإن لولا الرسالة كانت زمانها حزينة ومش عارفة هي فين بنتها

وقتها تولا عرفت إنها اختارت الصح وإنها عملت اللي عليها
لأنها وصلت الرسالة ومهتمتش بالظروف الصعبة اللي اتحطت فيها

كان في دب اسمه بيني، كان بيحب جدًا يعمل مغامرات
بيني كان بيقضي مع عيلته في الغابة أحلى الأوقات

كان كل يوم الصبح يصحى ويروح يتمشى في أماكن كتيرة
ولو شاف حد محتاج مساعدة بيعملها حتى كانت كبيرة

بيني كان دب محبوب في الغابة ولكن للأسف معندوش أصحاب
كل صداقاته مبتكملش ومكانش عارف إيه هي الأسباب

وعشان كده بيني معظم الوقت كان بيقضيه لوحده
يا اما في البيت نايم أو بيساعد حد من أفراد عيلته

وفي يوم، بيني كان عند النهر، وقعد يفكر في حاجات كتير
وقرر يومها إنه يروح في مغامرة يقضي فيها وقت كبير

وفعلًا تاني يوم الصبح، بيني سلم على عيلته وأخد حاجته
ومشي في طريق طويل، وراح عشان يبدأ المغامرة بتاعته

عدى على أماكن كتيرة جديدة وكان بيشوف حاجات مختلفة
كان بيني مبسوط بيومه وكان سعيد إنه بدأ فعلًا في المغامرة

يوم والتاني وبيني كان بيقابل حيوانات كتيرة جديدة
وكالعادة لو لقى حد محتاج بيساعدوا وملامحه سعيدة

لحد ما قابل في يوم زرافة، وكانت قاعدة شكلها حزينة
بيني قرب منها وسألها إذا كانت محتاجة أي حاجة

الزرافة قالتله لأ هي مش محتاجة حاجة ولكنها متضايقة
ولما سألها ليه، قالتله إن معندهاش أصدقاء ووحيدة

وإنها حاسه إنها أكيد وحشة وده السبب إن محدش بيصاحبها
وعشان كده هي دايمًا قاعدة هنا بتفكر وحزينة لوحدها

بيني قالها، مش معنى إن معندكيش أصحاب تبقي وحشة
ممكن تكوني ملقيتيش الصديق اللي يبقى بينكم صداقة حقيقية

وعلى فكرة أنا كمان معنديش أصحاب وبعمل مغامرة لوحدي
ولكني مش شايف إني السبب، وبحاول أستمتع دايمًا بوقتي

وإنه عارف إنه مهم وجميل حتى لو محدش بيقوله
لأنه من جواه بيعمل خير، وبيساعد أي حد محتاج له

الزرافة كانت مستغربة كلام بيني، وقالتله بس أنا دايمًا لوحدي
قالها إزاي وانتي عندك عيلة بتحبك، وأنا كمان عندي عيلتي

مش معنى إن مفيش أصحاب، يبقى محدش بيحبنا
الفكرة اننا نشوف الناس اللي حوالينا وبياخدوا بالهم مننا

ومنفكرش بس في الحاجات اللي مش موجودة زي أصحابنا
لأن ممكن يبقى عندنا أصحاب كتير، بس مش كويسين وبيأذونا

الزرافة اتبسطت من كلام بيني، وقالتله إنه خلاها تفكر بطريقة مختلفة
وإنها خلاص مش هتركز في حياتها على الحاجات اللي ناقصة

بيني كان مبسوط إنه قدر يساعدها وكمل طريقه في مغامرته
وكان سعيد لأنه بيعرف دايمًا إزاي يستمتع بكل وقت

كان في ولد اسمه زيد، كان عايش مع عيلته الجميلة
كانوا بيحبوا بعض جدًا وبيقضوا مع بعض أوقات سعيدة

زيد كان كل يوم الصبح بيروح المدرسة وهو نشيط وفرحان
لأنه كان بيحب يروح أوضة الرسم ونفسه يكون فنان

زيد في الفسحة كان علطول ياكل أكله ويروح يقعد يرسم
وبيقضي الوقت كله مع كراسة رسمه وهو سعيد ومبتسم

وفي يوم، كان زيد قاعد مع أصحابه وقالوله يوريهم رسوماته
ولما طلعها، كلهم انبهروا بيها، ماعدا واحد بس من أصحابه

قاله إنه مش هو اللي راسم الرسومات دي وبيضحك عليهم
ولما زيد حاول يدافع عن نفسه، الولد مسابش فرصة يفهمهم

وخلصت الفسحة وطلعوا كلهم بعدها على فصلهم
وزيد كان قاعد حزين، ولم كل رسوماته وفي شنطته شالهم

وفي أخر اليوم كان عندهم حصة رسم، وزيد مكانش فرحان
ولما المُدَّرسة شافته، قالتله أنا عمري ما شوفتك في الحصة زعلان

زيد قال للمُدَّرسة على اللي حصل مع أصحابه وكلامهم
وإن الولد قاله إنه بيكذب وإنه دول مش رسوماته اللي راسمهم

وقالها إنه ملحقش يدافع عن نفسه و إنه متضايق منهم
لأن أصحابه كان شكلهم مصدقين كلام الولد صاحبهم

المُدَّرسة قالتله أنا فاهمة سبب زعلك، ولكن خليك واثق في نفسك
ومش لازم تبرر لهم كلام صاحبك، ولكن ممكن تثبت لهم برسمك

وطلبت وقتها من كل الفصل يرسموا رسمه ويعرضوها
وأحلى رسمة في الفصل، هياخدوها وعلى الحيطة يعلقوها

زيد بدأ يرسم وكان مبدع وفنان كالعادة ورسم رسمة جميلة
ألوانها مظبوطة ومتناسقة مع بعضها، وكل تفاصيلها لطيفة

ولما خلصت الحصة، زيد رسمته كانت أحلى رسمة في فصله
والمُدَّرسة طلبت منهم يصقفوا له وعلقوها على الحيطة بإسمه

وقتها زيد بص على الولد اللي ضايقه ولقاه قاعد متغاظ منه
ملامحه كانت كلها ضيق، عشان زيد أثبت لأصحابه عكس كلامه

وبعدها المُدَّرسة قالت لزيد يخليه واثق دايمًا في قدراته
وميسمحش لحد يقلل منه، ولا يكون سبب ضيق في حياته

وكمان قالتله ميحاولش يتكلم عن نفسه وعن شطارته كتير
بالعكس يخلي شغله وتميزه هما اللي يتكلموا عنه بشكل كبير

كان في ولد اسمه آدم، كان طفل هادي ودمه خفيف
بيحب يلعب مع أصحابه، وبيحب الشتاء أكتر من الصيف

مع إن الصيف فيه الأجازة والراحة، ولكنه مبيحبش الحر أبدًا
ولما الشتاء ييجي والدنيا تبدأ تمطر، كان آدم بيبقى سعيد جدًا

آدم كان عنده أقرب صاحب له اسمه علي، وكان بيحبه
ولما علي كان يطلب منه أي حاجة، علطول بيساعده

وكان آدم أكتر حاجة بيحب يعملها هي إنه يقرأ قصصه
وعلطول يطلب من مامته تاخده المكتبة وتشتريله

وفي يوم، طلب علي من آدم يديله واحدة من قصصه يقراها
آدم كان متردد جدًا لأنه بيحب قصصه جدًا وبيخاف عليها

ولكنه عشان بيحب علي، إداله القصة وقاله يحافظ عليها
واتفق معاه على اليوم اللي علي هيرجعله القصة ومنه ياخدها

وفي اليوم اللي اتفقوا عليه، آدم راح المدرسة واستناه
ولكن علي يومها جه المدرسة ولكنه مجابش القصة معاه

ولما آدم سأله فين القصة وليه مجابهاش زي ما اتفقوا
علي ارتبك وقاله إنه نسيها وهيديهاله يوم تاني لما يتقابلوا

ويوم ورا يوم، علي مجابش القصة وكل مرة يقول أعذار
آدم كان متضايق لإنه مش بيحب يفضل كده في إنتظار

وفي يوم، آدم راح لعلي في المدرسة وقاله إنه عاوز يتكلم معاه
وقاله إنه حاسس إنه مخبي عليه حاجة ولازم يتكلم وياه

علي كان مكسوف من آدم ومكانش عارف يتكلم يقوله إيه
وبعدها قاله إن القط بتاعه قطع القصة وهو كان مخبي عليه

وعشان كده مكانش عارف يقوله إيه وخايف يتضايق منه
وكان بيحاول يقوله أي أعذار لحد ما يجيبله قصة زيها ويصالحه

آدم قال لعلي إنه زعلان جدًا منه، ولكن مش عشان القصة اتقطعت
زعلان لإنه مقالهوش الحقيقة، وكذب عليه ومقالهوش إنها باظت

وقاله المفروض كنت تقولي، وتبقى عارف إني مش هزعل منك
وإنك صاحبي ومهم عندي، ومش بسبب قصة هخاصمك

ومينفعش أبدًا تكذب عشان أي حد، لإن الكذب حرام وغلطة كبيرة
وعمر الكذب ما بيصلح حاجة، بالعكس مشاكله هتبقى كتيرة

علي ندم على اللي عمله واعتذر لآدم ووعده ميكذبش تاني أبدًا
واتصالحوا هما الاتنين وبقوا بيقضوا مع بعض وقت جميل جدًا

كان في غابة جميلة جدًا، مليانة بحب كتير وسعادة
كل الحيوانات كانوا أصحاب وما بينهم صداقة

في الغابة كان عايش مودي الأرنب مع عيلته الجميلة
كانوا عيلة كبيرة وبيحبوا يقضوا أوقات مع بعض لطيفة

مودي كان أرنوب شقي جدًا وبيلعب ويتنطط طول النهار
وكان بيحب يجري في الغابة ويلعب حوالين الأشجار

أكتر اتنين قريبين منه هما الدب سمسم ولولا الغزالة
كانوا بيقضوا أوقات كبيرة مع بعض بيلعبوا في سعادة

وفي يوم، كان عيد ميلاد مودي وكان عازم عليه كل أصحابه
وكان بيستعد لليوم ده من بدري وبيجهز كل حاجة عشانه

وفي يوم عيد الميلاد، كل أصحابه كانوا موجودين معاه
ما عدا سمسم الدب، هو الوحيد اللي محضرش وياه

مودي كان زعلان ولكن سمسم جاله بعدها واعتذر له
وقاله إنه كان عنده حاجة ومعرفش ييجي عيد ميلاده

مودي مكانش زعلان من سمسم عشان اعتذر له بعدها
ولكنه سأله إيه هي الحاجة اللي حصلت وقتها

سمسم قال لمودي إنها حاجة مش هيقدر يقوله عليها
ولكن مودي كان عنده فضول يعرف الحاجة اللي مخبيها

وراح مودي سأل الغزالة لولا إذا كانت تعرف السبب إيه
ولكن لولا قالتله إنها متعرفش لأن سمسم مقالهاش عليه

يوم والتاني ومودي كل ما يشوف سمسم يسأله
لحد ما بقى سمسم ميخرجش مع مودي ولا يقابله

ولما راح مودي عند سمسم في البيت يشوفه مبيقابلوش ليه
سمسم قاله إنه زعلان منه عشان هو كل شوية يزن عليه

وبيسأله عن حاجة هو قاله كذا مرة إنه مش عاوز يتكلم فيها
وإنه مبقاش يقابله عشان مش عاوزه كل شوية يسأله عليها

مودي روح البيت يومها زعلان وحكى لمامته على كل الحكاية
ماما قالتله إن سمسم الدب من حقه ميحكيش كل حاجة

وطالما انت قبلت اعتذاره عشان محضرش عيد ميلادك
يبقى ملكش حق تسأله عن الحاجة اللي قالك إنه مش هيحكيهالك

وعمومًا مش صح إنك تحاول تعرف حاجة غصب عن صاحبها
لازم تحترم إن كل واحد عنده حاجات ممكن ميبقاش عاوز يقولها

ومهما كان الشخص ده قريب منك وانتوا أصحاب جدًا
لازم تحترم حدوده وتعمل الحاجة اللي بتريحه دايمًا

مودي يومها اتعلم غلطته وقال لمامته إنه فهم قصدها
وراح لسمسم وقاله إنه هيحترم الحاجة اللي مش عاوز يقولها

ومن يومها رجعوا مودي وسمسم من تاني أصحاب قريبين
بيقضوا وقتهم مع بعض هما ولولا وبقوا علطول مبسوطين

كان في غابة جميلة وفيها عايش حيوانات كتير
بيلعبوا وبيحبوا بعض جدًا، والغابة فيها نهر كبير

في وسط الغابة كان عايش القنفد سيمو، كان طيب ولطيف
وأقرب صاحب له كان النمر بيرو، وكان مضحك وظريف

بيرو وسيمو كانوا بيخرجوا مع بعض يقضوا وقت طويل
بيلعبوا وينزلوا النهر ويرجعوا بيتهم كل يوم أخر الليل

وفي يوم الصبح النمر بيرو كان رايح عند سيمو القنفد زي عادته
ولكنه في الطريق سمع الزرافة بتتكلم على سيمو من ورا ضهره

وقف النمر بيرو يسمع الزرافة بتقول على صاحبه سيمو إيه
وسمعها بتقول إنه مغرور ومش طيب وكلام كتير وحش عليه

بيرو النمر مكانش عارف يعمل إيه ولكنه كان متضايق عشان صاحبه
وقعد وقت طويل يفكر وبعدها قرر إنه يروح لسيمو ويحكيله

وبعدها راح لسيمو وقاله إنه سمع الزرافة بتقول عليه كلام وحش جدًا
سيمو سمعه للآخر ولكنه قاله إن تصرفه ده مكانش متوقعه أبدًا

ومشي سيمو وساب النمر بيرو، وبيرو مكانش فاهم في إيه
راح وراه البيت وكان بيحاول يتكلم معاه ولكن سيمو مردش عليه

يوم ورا يوم وسيمو مختفي مش بيخرج خالص في الغابة
وبيرو مكانش عارف يوصله وعاوز يتكلم معاه ويفهم كل حاجة

ولكن سيمو مكانش بيقابله ولا بيخرج يرد عليه لما يروحله
بيرو روح البيت بتاعه وكان متضايق وراح قعد في أوضته

وبعدها بيوم، سيمو راح عند بيرو البيت وخبط على بابه
بيرو مكانش مصدق إن صاحبه راحله عشان يقابله

بيرو النمر قال لسيمو إيه اللي حصل ومالك ليه متضايق مني
سيمو قاله عشان مكانش المفروض تقولي أي كلام سمعته عني

إنت أولاً غلطت لما وقفت تسمع الزرافة بتقول عليا إيه يومها
وكملت الغلطة لما حكيتلي عن حاجة كان ممكن معرفش أبدًا عنها

وبسبب كلامك أنا بقيت زعلان من الزرافة طول الوقت جدًا
ولو مكنتش قولتلي مكنتش اتضايقت ولا حاجة زعلتني أبدًا

بيرو النمر فهم كلام سيمو صاحبه واعتذر له عن اللي عمله
واتعلم يومها مينقلش الكلام أبدًا ولا يتكلم غير في اللي يخصه

كان في بنوتة جميلة اسمها سجدة، كانت ابتسامتها لطيفة
بتحب تساعد مامتها في البيت وبتعمل معاها حاجات كتيرة

سجدة كانت هادية وذكية جدًا وبتاخد بالها من تصرفاتها
وبتتعامل مع كل اللي حواليها بلطافة وعلى وشها ابتسامتها

سجدة كانت طول الوقت نفسها تبقى كبيرة بسرعة
مش عاوزة تبقى طفلة، وشايفة إن حياة الكبار روعة

وقالت لمامتها إنها مش عاوزة تروح المدرسة تاني أبدًا
وعاوزة تبقى كبيرة وتصحى براحتها وتستمتع بحياتها دايمًا

ولما ماما سألتها ليه عاوزة متبقيش طفلة وتبقي بسرعة كبيرة
قالتلها لأن الكبار بيعملوا كل حاجة نفسهم فيها بسهولة

ماما ابتسمت وقررت توريها بنفسها إن الحياة مش زي ما هي فاكرة
واتفقت معاها تخليها تعيش يوم كامل، زي الكبار ومتكونش طفلة

ولكن لازم تشوف وتعمل كل حاجة زي ما ماما بتعملها
سجدة اتحمست جدًا، وقالت لماما إنها موافقة على خطتها

وتاني يوم، ماما صحيت بدري جدًا وصحت سجدة معاها
سجدة مكانتش عاوزة تصحى ولكن ماما فكرتها بإتفاقها وياها

صحيت سجدة وساعدت ماما تعمل الفطار بتاعهم
وبعدها راحوا يروقوا الأوض ويحضروا لبسهم

وراحت يومها سجدة مع ماما الشغل وقضته كله هناك
كانت قاعدة بتذاكر جنب ماما في شغلها على كرسي جنب الشباك

وبعدها ماما أخدتها وراحوا السوبر ماركت يشتروا حاجاتهم
ولما روحوا البيت وقفوا سوا في المطبخ يحضروا الأكل بتاعهم

وبعد ما أكلوا، ماما أخدت سجدة وغسلوا الأطباق كلها
وبعدها ماما كان عندها حاجات في البيت تاني تعملها

ولكن سجدة كانت خلاص تعبت مش قادرة تعمل حاجة
وقالت لماما إنها مستمتعش باليوم زي ما كانت فاكرة

ماما حضنتها وقالتلها، لازم قبل ما تتمني حاجة تفهميها
مش كل حاجة بتشوفيها من بعيد، إنتي حقيقي تعرفيها

كل واحد عنده مسؤوليات، سواء كانت شغله أو مذاكرته
ولازم كل حد فينا يعمل اللي عليه، ويقدر ينظم حياته

حاولي تستمتعي بالوقت اللي انتي فيه بتذاكري ولكن كمان بتلعبي
ولما بتحتاجي حاجة بساعدك فيها، وبعدها بتروحي ترتاحي

عشان لما تكبري ويومك يبقى مشغول برضه تكوني مبسوطة
لأنك من صغرك بتعرفي تستمعي ولكن كمان بتكوني مسؤولة

سجدة اتعلمت يومها درس مهم جدًا من مامتها
وعرفت إنها لازم تستمتع بالمذاكرة زي ما بتفرح في أجازتها

كان في بيت كبير ساكن فيه عيلة صغيرة ولطيفة
كان فيهم بنت اسمها حنين، كانت مؤدبة وظريفة

حنين كانت بتحب ترسم وكانت شاطرة فيه جدًا
ولما تخلص مذاكرتها كانت تقعد ترسم دايمًا

مامتها وباباها كانوا طول الوقت بيشجعوها
ولما بتحتاج أي مساعدة، كانوا دايمًا يساعدوها

حنين كانت كل يوم بتروح المدرسة وهي مبسوطة
وبتحب تقضي وقتها مع صحباتها هناك وبتكون سعيدة

وفي يوم جت بنوتة جديدة الفصل وكانت شقية جدًا
بتعمل دوشة في الفصل ومش بتقعد مركزة في الحصة أبدًا

يوم ورا يوم كل البنات بعدوا عنها وبقت بتقعد لوحدها
وده خلاها تضايقهم أكتر لإن محدش فيهم بيحبها

حنين في يوم قررت تروح تتكلم مع البنت وتتعرف عليها
وراحتلها في الفسحة وهي لوحدها وبدأت تتكلم معاها

البنت في الأول مكانتش بتتكلم معاهل بطريقة لطيفة
ولكن حنين بإسلوبها الجميل بدأت تكلمها بطريقة كويسة

واتعرفت عليها وقالتلها إنها تحب لو يكونوا أصحاب
وكمان يقعدوا في الفصل مع بعض ويكونوا أحباب

البنت استغربت من حنين وطلبها لإن محدش بيكلمها
ولكنها وافقت لإنها كانت عاوزة حد يقعد معاها ويصاحبها

وبعد كام يوم، حنين اكتشفت إن البنت دي بجد طيبة
وإنها شخصيتها جميلة عكس كل تصرفاتها الشقية

ولما سألتها ليه بتعملي دوشة وتخلي الناس تبعد عنك دايمًا
قالتلها لإن دايمًا البنات بيتريقوا عليا وبيضايقوني جدًا

فقررت إني لما أجي المدرسة الجديدة هضايقهم
عشان محدش يعرف يضايقني، ومش مهم أصاحبهم

حنين فهمت كلام البنت، وقالتلها ولكنك حقيقي مميزة
شخصيتك جميلة وموهوبة في الرسم وشاطرة

واتفقوا هما الاتنين يقعدوا يرسموا مع بعض لوحات كتير
وبدل الشقاوة، بقت البنت تطلع طاقتها في الرسم بشكل كبير

وبقت أهدى مع باقي البنات ومش خايفة حد يضايقها
وهما كمان ابتدوا يحبوها ويعلقوا على جمال رسوماتها

حنين كانت مبسوطة بالتغيير اللي حصل لصاحبتها
والبنت شكرت حنين إنها وقفت جنبها وساعدتها

ومن يومها بقت البنت دي محبوبة في كل المدرسة
وبترسم وتعلق رسوماتها وعلاقتها بحنين حقيقية ومميزة